ভালপোৱাৰ আনন্দ বিষাদ
----------------
দেৱদাসী তোৰ বুকুত
ক্ষত্ৰিয় মোৰ ভালপোৱা;
চকুপানীৰ বতৰত ৰুই থৈছো
হালধীয়া জীৱনৰ শিমলু,
নিয়ে যদি নিয়ক উৰুৱাই
হেপাহে তোৰ ,
দুখৰ মোৰ সমস্ত তুলা !
সাগৰতলি তোৰ বুকুত
যন্ত্ৰণাৰ মই বোবা শংখ;
কতনো শুনিবি আৰু
নাৱৰীয়া ৰাতিৰ তোলনীয়া সুৰ,
লংগৰৰ হাকোতাই বাকুহি নিয়া
চকুপানীৰ মাতাল বন্দৰ;
থাকক দে নিতাল মাৰি তাতেই
নাবিকৰ কাঙাল চহৰ !!
তেজেদি চেকুৰি আহে মোৰ
কোনজাক বনৰীয়া ঘোৰা,
তইনো কিটো বুজিবি ?
চাবি
বতাহৰ নাৱ বাই ,
থৈ যাম ছটিয়াই
শিমলু তোৰ চহৰত
বিষাদৰ এমুঠি পনীয়া !!
*****
১৫-০১-১১
No comments:
Post a Comment