মৌনতাৰ মাত
==========
মৌনতা শব্দৰ মাতৃভাষা
উচ্চাৰণৰ নিজান মূল;
মৌনতাৰ হাতত খোদিত হৈ থাকে
আবিয়ৈ আখৰৰ প্ৰথম প্ৰাৰ্থনা,
শোকৰ নিৰ্জন ভুগোল;
বনকৰা বুকুত মৌনতাই লুকুৱাই থয়
কেতিয়াবা
শব্দৰ ক্ষত হৃদয়,
কেতিয়াবা প্ৰসন্ন ৰ’দৰ শ্ৰুতলিপি;
অলপ কাতৰ অলপ বিষন্ন,
কাণ পাতিলেই যেন বাজি উঠে ওঠত
শূন্যতাৰ নিৰল আবৃতি !
সকলো কথাৰ শেষত যিখিনি কব ৰৈ যায়
প্ৰিয়তমা নাৰীক
সকলো আলাপৰ শেষত যিখিনি ৰৈ যায়
নৈশব্দৰ ধ্বনিত
সেয়াইতো মৌনতা,
ভালপোৱাৰ দৰে যি পূৰ্ণতাৰ সত্য
ৰহস্যৰ দৰে যি সুন্দৰ
আৰু নিৰ্জনতাৰ দৰে যি মুখৰ !
**********
৫-১০-১২
No comments:
Post a Comment