উচ্চাৰণ..

স্মৃতিত নিশিগন্ধা
----------------

দস্যু ৰাতিটোৱে ক্ৰমা‍ত্‍ চেপি আনিছে
মোৰ নিৰ্দোষ কলিজা;
বিষত কোঙা হৈ থিয় হব খুজিছো ম‍ই
তোমাৰ স্মৃতিত হেলাম দি
কাষত মোৰ কাতৰ অনিদ্ৰা...!!

এপ্ৰিলৰ জোনজনী গাভৰু হৈ উঠিছে,
তোমাৰ বুকুৰ দৰে
আৰু একলা দুকলাকৈ বাঢ়ি আহিছে
মোৰ বিষাদ  চতুৰ্থী
...........
কলেজ উইকৰ ভৰ্ত্তি হ’লত
এদিন হঠাত্‍ খুন্দা খাইছিল মোৰ নিৰল হৃদয়
তোমাৰ চকুৰ জিকাফুলীয়া গোন্ধত;
চাও নাচাও এক আকুলতাৰ ইন্ধনত
ম‍ই ঘুৰি ফুৰিছিলো এটা তুমিময় বৃত্তৰ চৌপাশে
এক কৰুণ স্পৰ্শক হৈ,
চিটিকি পৰা তোমাৰ হাহিৰ কুটা কঢ়িয়াই কঢ়িয়াই
এদিন মোৰ বুকুত বাহ বান্ধিছিল আহি
এটা অঘৰী পানীপিয়াই;

আৰু এতিয়া
এপ্ৰিলৰ এই খহনীয়া ৰাতিত
যাপন কৰি সহস্ৰ যন্ত্ৰণা
ম‍ই জাহ গৈছো নিজৰেই মাজত;
বেদনাৰ সকলো চিকাৰী চৰাইৰ বাবে
মুকলিকৈ সজাই থৈ মোৰ ৰক্তাক্ত হৃদয়
ম‍ই আয়োজন কৰিছো তুমিহীনতাৰ তুমুৰুলি উত্‍সৱ....

ভালপোৱা,
এবাৰ চাই যাহি এই বিবৰ্ণ ৰাতিত
নিমগ্ন মোৰ দুখৰ ক’লাজ;
কঠিন ৰাতিৰ খোলা ভাঙি
বৰষিব দে মোৰ হৃদয়ত
তেওঁৰ যাতনাৰ কাইটীয়া বৰষুণজাক;
বোৱাই নে মোৰ
বিদীৰ্ণ বুকুৰ তেজ
তেওঁৰ প্ৰিয়তম ফুলৰ ৰং হবলৈ...

মৃত্যুৰ সকলো কৌশল কাতি কৰি
অ’ ভালপোৱা,
জী উঠিব দে মোক শেষবাৰ
তেওঁৰ চকুৰ সজল উপত্যকাত
উদভ্ৰান্ত অৰ্কিড হৈ !!


*************
                 ১১-০৪-১২