উচ্চাৰণ..

আত্মহত্যা
========

সুহৃদ জৰীবোৰত দ্ৰবীভূত হৈ থাকে
নিজম মৃত্যুৰ হেন্দোলনি,
যেন দাপোনৰ আগৰ
কোনো সুন্দৰী নাৰীৰ আত্মবিভোৰতাহে !

চল চাই পিছলি যায়
নেগুৰীয়া শংখৰ বগা খোলাৰ পৰা
গুৰগুৰীয়া সময়ৰ নিমখ,
উশাহৰ গুহাই গুহাই শিপায়
এটা চোৰাং স্পৃহাৰ পিছল শেলুৱৈ

শাৰী শাৰী অৱচেতনাৰ বনস্পতি
নিস্পলক এটা খেয়ালৰ আঙুঠিত
ওলমি ৰ’ল,
মৃত্যুমুখী কোনো বৃদ্ধ আচামীৰ
শেষ ইচ্ছাৰ নিস্পৃহতাৰে !

**********
২৪-০৬-১২