উচ্চাৰণ..

অনুভৱত শৰত্‍
=========

ছেপ্তেম্বৰৰ বেৰা বগাই
মোৰ কেলেণ্ডাৰৰ পাতত
টিকটিকাইছেহি শৰত্‍ৰ জেঠী;
ফিৰফিৰিয়া শীতৰ চোলা পিন্ধি
বতাহো হ’লহি নতুন আলহী;

চালনীত এনেকৈ
কোনে জানো চালিছিল নিজান জোনক,
ৰাতিৰ গালে মুখে দেখোন এতিয়া
জোনাকৰ ধূলি;
সুদীৰ্ঘ শূন্যতাৰ পৰা যেন
বিয়োগ কৰি থও নিজক,
উদাসীনতাৰ সাথৰ ভাঙি পাৰ হৈ যাও মোৰ
একান্ত অতীত, বিশ্বস্ত বৰ্তমান,
পালন কৰো বিষাদৰ মুকলিত
ভালপোৱাৰ হীৰক জয়ন্তী
সুললিত, সকল্যাণ;

নিয়ৰৰ ফেচকুৰি মোহাৰি
আজি পুৱাই,
শেৱালিৰ গোন্ধটোৱে নদীখনক জোকাইছিল;
বাৰাণ্ডাত আহিনৰ চাদৰ শুকুৱাই
হঠাতে উচপ খাই উঠিছিল
বিধৱা কঁহুৱাই,
ৰ’দৰ শিতানত যেন গধুলিগোপালৰ গোন্ধ,
যোৱা ৰাতি তেওঁ আহিছিল হবপায় !!

**********
১৫-০৯-১২