স্বপ্নদোষ
======
নাভিয়েদি এখন বৰফৰ নদী
হাত মেলি ঢুকি পাও নাপাও দুপাৰ,
ইড়ি নে পিঙ্গলা
শোকৰো অদ্ভুদ বাট;
পিয়াহৰ আঙুঠি পিন্ধি উৰি অহা এটা অশান্ত চৰাই
পদুমৰ ছাত জড়তাৰ অৰ্থ ভাঙে
ঠোটত বৰফ ভঙাৰ মাত;
ভটিয়লি সপোনৰ তলত সাৰে থাকে এটা অস্থিৰতাৰ মৃগনাভি
বুকুজুৰি ধোৱায় অলঙ্ঘ্য শব্দহীনতা
শৰীৰৰ দৰে সৰ্বত্ৰ এটা যেন প্ৰাচীন পাপ,
ক্লান্তিৰ এজাক বাৰিষাই আলিঙ্গনৰ অভ্যাস কৰে
সমৰ্পনৰ এটা জোনৰ হাতত ধৰি
উঠি আহে ডুবাৰু বিষাদ,
সেই অস্থিৰতা এটা শংকাৰ নাম আছিল
সেই অক্ষমতা এটা দীক্ষাৰ নাম আছিল
পশ্চাতাপৰ আঙুলিত এটা যেন দুপৰ মাত,
ধূমায়িত বিশ্বাসৰ সন্মোহনত দুলি
এটা যেন গান্ধাৰ অনুৰাগ
চুব নোৱাৰা শূন্যতাৰ নগ্নতাত !
********************
১৩-০৩-১৩
No comments:
Post a Comment