Wednesday 21 November 2012


পতাকা
=====

যুদ্ধফেৰত্‍ সৈনিকবোৰে সুহুৰিত তুলি লৈছে
গানগোৱা মেঘৰ মূল,
বুকু জুৰি উদ্ভাসিত ঘনিষ্ঠ মাটিৰ বিশাল প্ৰতিভা;
হে সহৃদয় নাগৰিক
কাকবন্ধ্যা ঋতুৰ শিপা উঘালি আমি ৰুই থও
সুৰ্য্যমুখী অৰণ্য;

চকুত সামৰি নষ্ট ৰাতিৰ  ইতিহাস
পৃথিৱীয়ে খুলি থৈছে শোকৰ শুৱনি সাজোন;
এতিয়া বুকু ঠন ধৰি  জ্যোতিৰ্ময় দিনৰ সভ্যতা
ভালপোৱাৰ গন্ধময় আবাস;
ৰ’দৰ সম্ভ্ৰান্ত খবৰ লৈ
এতিয়া পদুলিত নয়নতৰা,
খিৰিকীত আশ্বস্ত প্ৰভাত !

গোমোঠা পাহাৰ আৰু ম্ৰিয়মান নদীৰ উপত্যকাবোৰ
পাৰ হৈ
সৈনিকবোৰ উভতি আহিছে
প্ৰিয়তম শেষৰখন চিঠিৰ উত্তৰ হৈ;

***********
২০-১১-১২

No comments:

Post a Comment