মেডুচা
========
চকুলে তেওঁৰ এখন ওলোমা দলং ,
এমুঠি সোণালী বালি মুঠিত লৈ
বাট বুলিছো মই
খোজবোৰ একো একোটা শিল;
দুবাহুৰ সৰিসৃপে ক্ৰমাত্ মেৰিয়াই আনিছে
জীৱনৰ শান্তশীল অভিশাপ,
কাৰ বা মণিবন্ধত দুলিছে সেই খাৰু
পোহৰে জিলিকাইছে যাৰ
মোৰ সিৰাৰ ঈষত্ নীলা?
এডিঙি তেজৰ শূন্যতাৰ অন্তত
উশাহৰ দুফাল জিভাত দুখ হৈ তিতিছে এতিয়া
মোৰ শান্তিৰ খঙাল স্বাদ;
ভালপোৱা ! কি এক অনাবিল শুভ্ৰতা
শিল হৈ শিপাইছিল
তেওঁৰ চকুৰ অগাধ সেমেকাত ;
কি দাপোনত ভাঙি দেওঁলগা চুলিৰ জোঁট
শুই ৰয় মৃত্যুৰ বিস্ময় মুখ,
কোনো নতুন প্ৰেমিকাৰ দৰে
অসহজ অপ্ৰস্তুত !!
***************
৯-০৭-১২
No comments:
Post a Comment